«Асханадағы тәртіп» тақырыбында танымдық іс-шара өткізілді

 Мектебімізде бастауыш сынып оқушыларының асханада өзін-өзі ұстау мәдениетін қалыптастыру, тазалық пен тәртіпке баулу мақсатында «Асханадағы тәртіп» тақырыбында танымдық іс-шара ұйымдастырылды.

Іс-шара барысында оқушылар асханада сақталуы тиіс негізгі ережелермен танысып, дұрыс тамақтану мәдениеті туралы мағлұмат алды. Балалар тақырыпқа байланысты суреттер мен слайдтарды тамашалап, өз ойларын ортаға салды. Сонымен қатар топтық жұмыстарға қатысып, асханадағы тәртіпке қатысты постерлер мен кластерлер құрастырды.

Сабақ барысында оқушылар:
1. асханаға қолды таза жуып кіру;
2. тамақтану кезінде әдеп сақтау;
3. дастархан басында дұрыс отыру;
4. тағамды ысырап етпеу;
5. тазалық пен ұқыптылықты сақтау;
6. асхана қызметкерлерінің еңбегін құрметтеу сияқты маңызды қағидаларды талқылады.

Топтық тапсырмалар арқылы оқушылар өз білімдерін бекітіп, асханадағы тәртіптің денсаулық пен мәдениеттіліктің негізі екенін түсінді. Пазл құрастыру, ой қозғау, пікір алмасу және шығармашылық жұмыстар балалардың қызығушылығын арттырып, белсенді қатысуына мүмкіндік берді.

Іс-шара соңында оқушылар асханадағы тәртіп ережелерін сақтау әрбір адамның міндеті екенін атап өтіп, күнделікті өмірде осы қағидаларды ұстануға уәде берді.
Осындай тәрбиелік маңызы зор шаралар оқушылардың жауапкершілігін арттырып, салауатты өмір салтын қалыптастыруға ықпал етеді. Мектебімізде бұл бағыттағы жұмыстар алдағы уақытта да өз жалғасын табатын болады.